కొత్తబ్లాగు

బ్లాగ్మితృలందరికీ నా నమస్కారం ! అందరికీ వైకుంఠ ఏకాదశి శుభాకాంక్షలు. అలాగే మరోసారి నూతన సంవత్సర శుభాకాంక్షలు !

కొత్తసంవత్సరంలో మరో కొత్తబ్లాగు. బ్లాగు కొత్తదేగానీ నేను పాత వాడినే. అదేనండీ సరస్వతీ కుమార్‌ను. నా శంఖారావం బ్లాగు ద్వారా నేను మీలో చాలా మందికి పరిచయమైనవాడినే. నేను చదివిన పుస్తకాలను పరిచయం చేయడానికి ఉద్దేశించిన నా వర్డ్‌ప్రెస్ బ్లాగ్ వేణుగానం కూడా మీకు తెలిసే ఉంటుంది. ఈ రెండూ కాక ఇప్పుడు నేను ‘సుధర్మ’ పేరుతో ఈ కొత్త బ్లాగును ప్రారంభిస్తున్నాను. దీని URL-http://sudharmasabha.blogspot.com.

అరుదుగా టపాలు రాసే నాకు మరో బ్లాగెందుకంటారా! కొన్ని కారణాలున్నాయి. నేను చెప్పదలచుకున్న లేక నాకు తెలిసిన విషయాలలో ఒక బ్లాగులోనే వర్గాలు, ఉపవర్గాలుగా విభజించేంతటి డైవర్షన్ ఏమీ ఉండదు. అందుకే ఒకే రకమైన విషయాలకు ఒక బ్లాగు చొప్పున కేటాయించదలచుకున్నాను. అదీగాక ఒక బ్లాగును అంతులేని టపాలతో ఓ మహా సముద్రంలా మార్చటం నా వరకూ నాకు ఇష్టం ఉండదు. బ్లాగుకు ఓ వంద, నూట యాభై మించి టపాలు లేకుండా చూడాలనుకుంటున్నాను.

నా బ్లాగును ఎవరైనా, ఎప్పుడైనా ఓ పుస్తకంలా మొదటి టపా నుండి, చివరి టపా వరకు చదివేయగలిగేటట్లుగా ఉండాలి. బాగా ఎక్కువ టపాలున్న బ్లాగును ఇలా చదవడం కుదరకపోవచ్చని నా అభిప్రాయం. అయితే అందరికీ నేనీ సలహాను ఈయబోవడం లేదు. నేనెటూ టపాలు రాసేది అరుదుగానే కనుక ఈ విధానం నాబోటి వారికి వీలుపడుతుంది అనుకుంటున్నాను.

ఈ బ్లాగుకు పెట్టిన ‘సుధర్మ’ అనే పేరంటే నాకు చాలా ఇష్టం. మొదట నేను ఈ పేరును నా మొదటి blogger బ్లాగుకే పెడదామనుకున్నాను. కానీ అప్పటికే shankharavam అన్న పదంతో URL క్రియేట్ అయిపోయింది. బ్లాగు పేరు కూడా URL లో ఉన్న పదమే అయితే బావుంటుందనుకుని దానినే ఉంచేశాను. తరువాత నా వర్డ్‌ప్రెస్ బ్లాగుకైనా ‘సుధర్మ’ అని పేరు పెడదామనుకున్నాను.. పెట్టాను కూడా. రెండు మూడు రోజుల పాటు అదే పేరుతో ఉన్నది. దానికి ‘ఇది శ్రీకృష్ణుని సభ’ అనే ట్యాగ్ లైన్ కూడా పెట్టాను. :b కానీ, పుస్తక పరిచయాలకు ఉద్దేశించిన బ్లాగుకు ‘సుధర్మ’ అనే పేరెందుకులే అని భావించడంతోపాటు శంఖారావానికి మాచింగ్ గా ఉంటుందని ‘వేణుగానం’ అని పేరు మార్చేశాను.

ఇక ఇప్పటికి ఈ కొత్తబ్లాగుకు ఆ పేరు పెట్టడంతో నా కోరిక తీరింది. ఇంతకీ ‘సుధర్మ’ అంటే ఏమిటో.. ఆపేరుకు గల విశేషాలేమిటో తెలుసుకుందాం.

శ్రీకృష్ణునకు దేవేంద్రునిచే బహుమతిగా ఈయబడిన సభామందిరం పేరే ‘సుధర్మ’. శ్రీకృష్ణుడు ఈ సభామందిరంలోనే కొలువుదీరేవాడు. శ్రీకృష్ణుడు మరణించిన తరువాత అర్జునుడు కూడా ఈ సుధర్మ సభలోనే ద్వారకా వాసులందరినీ కొలువుదీర్చి మాట్లాడాడు.

అందుకే ఈ సుధర్మ అనే పేరు మన భారతీయ సంస్కృతికి, వారసత్వానికి ప్రతిబింబంగా అనిపిస్తుంది. బెంగుళూరు నుండి వెలువడుతున్న ప్రపంచం మొత్తంలోని ఒకే ఒక సంస్కృత పత్రిక పేరు కూడా సుధర్మే అని నాకు ఈ మధ్యనే తెలిసినది. ఎవరో బ్లాగ్మితృడు ఆ పత్రిక గురించి టపా కూడా రాసినట్లు గుర్తు.

నేను శంఖారావానికి గానీ, వేణుగానానికి గానీ ఇలా కొత్త బ్లాగు పరిచయం రాసుకోలేదు. నేను మిత్రుల ద్వారానో లేక మరెవరైనా తెలిసిన వారి ద్వారానో బ్లాగింగ్ ను ప్రారంభించలేదు. ‘ఈనాడు’ దినపత్రిక ఆదివారం అనుబంధ పుస్తకాలలోని వ్యాసాలను చదివి, వాటిలో వివరించిన విధివిధానాలు కొంత అర్ధమై, కొంత అర్థంకాక.. అలా కన్‌ఫ్యూజన్ తో ఆ రెండు బ్లాగులూ ప్రారంభించాను. అందుకే ఆ కంగారులో కొత్త బ్లాగు పరిచయం లాంటివేమీ లేకుండా ఒకేసారి మామూలు పోస్టులు రాసేశాను. ఈ టపాతో ఆ లోటు కూడా తీరింది. :b

ఈ కొత్తబ్లాగు పరిచయ వ్యాసంలో నా బ్లాగును ఆదరించమని నేను కోరాలనుకోవటం లేదు. ఎందుకంటే బ్లాగులో అడ్డమైన చెత్త, సోది రాసి ఆదరించమని వేడుకున్నా ప్రయోజనం ఉండదు. టపాలలో విషయం ఉండి, రచనా శైలి ఆసక్తి జనకంగా ఉంటే ఆదరణ దానంతటదే వస్తుంది. కనుక ఆదరించమని ప్రత్యేకించి కోరే అవసరంలేదని అనుకుంటున్నాను. నా వరకూ నేను ఈ ఆదరణ గురించి పెద్దగా పట్టించుకోను కూడా. నా భావాలను క్రమబద్దీకరించుకోవడం, మరింత స్పష్టపరచుకోవటం, వాటిని అందరికీ అందుబాటులో ఉండే ఒక శాశ్వతమైన చిరునామాలో పొందుపరచటం.. ఇవే నేను బ్లాగులు రాయడం లోని ప్రధాన ఉద్దేశాలు.

ధన్యవాదాలు !